Milliliðahagkerfið

-Komdu með að stofna orkufyrirtæki, það þarf ekki að framleiða orku, bara kaupa og selja eitthvað,  það kallast samkeppnisvæðing.

-Samkepnnisregluverk EES segir að orkufyrirtækið sem við stofnum eigi rétt á að fá að taka þátt í útboðinu þegar Borgin býður út, á EES-svæðinu, innstungur fyrir batteríisdollur.

-Borgin, sem er eigandi Orkuveitu Reykjavíkur og eini orkuframleiðandinn á svæðinu, getur ekki neitað okkur um þáttöku samkvæmt EES-regluverkinu.

-Ef Borgin ætlar sér að nota sín eigin orkufyrirtæki milliliðalaust klögum við bara í silkihúfurnar, Kærunefnd útboðsmála eða beint í Brussel. (Mbl 26 og 28.6)

Atvinnusköpun föst í EES-reglum

"Félagsmenn okkar eru einfaldlega farnir að veigra sér við að fjárfesta því það er of dýrt og flókið" - "Félagsmenn SA bentu á hversu þunglamaleg stjórnsýslan er orðin og hversu miklum tíma og fjármunum sé eytt í alltof flókið regluverk" https://www.frettabladid.is/markadurinn/fyrirtaeki-veigra-ser-vid-ad-fjarfesta/

 

Regluverk EES gerir íslensk fyrirtæki ósamkeppnishæf

Máttlítil landstjórn

fer nú brátt að skila af sér, hún náði ekki að standa vörð um sum helstu hagsmunamál landsmanna en dró landið dýpra í tískustjórnmál og kviksyndi ESB/EES.

Landstjórn sem ekki gætti hagsmuna Íslands

Sérfræðingaveldið

Ein mesta vá nútímasamfélags er hvernig síaukin áhrif sérfræðinga á öllum sviðum kæfa alla skynsamlega umræðu í stjórnmálum og lýðræðið verður innantómt hjal. Kjörnir fulltrúar láta blaðafulltrúa sína svara fyrirspurnum á vélrænan hátt, ekki áliti kjörinna fulltrúa, heldur áliti "ráðuneytisins", "stofnunarinnar" o.s.f.

Ráðherrar eru farnir að tileinka sér stofnanamál sérfræðinganna í stað þess að segja eitthvað frá eigin brjósti sem fólk skilur. Til að forðast að taka pólitíska ákvörðun setja ráðherrar málið í nefnd sérfræðinga og lesa upp niðurstöðu nefndarinnar sem stefnumörkun í málinu.

Í raun eru ráðherrar og Alþingi strengjabrúður sérfræðingaveldisins, hvort sem það er innlent sem erlent. Gott dæmi um það er innleiðing tilskipanna og reglugerða ESB sem innleiddar eru í íslenskt lagasafn, næsta sjálfvirkt. Ferilinn er að þessar gerðir eru þýddar á íslenskt stofnannamál, þær síðan sendar utanríkisnefnd Alþingis, nefndin kallar til sín tvo eða fleiri sérfræðinga ráðuneytanna og síðan er málið samþykkt.    

Viðskilnaður Alþingis

Þingmenn sem nú skila af sér komu ýmsum tilskipunum frá ESB yfir landsmenn og venju samkvæmt nokkrum vondum síðasta daginn, orðnir þreyttir, háttvirtir og hæstvirtir. En þeim tókst að forða landsmönnum frá stjórnarskrárskemmdum og friðun örfokalands.

Viðskilnaður Alþingis 13 júní 2021

Viðskipta og viðreisnarráð ESB á Íslandi

Það er kostulegt að heyra ESB sinna Viðreisnar margstaglast á fullyrðingum um að íslenska krónan sem gjaldmiðill kosti þjóðarbúið á ári um 130 milljarða (10 ára gömul gervivísindi) í samanburði við að taka upp EVRU. Útkomuna var fengin með hávísindalegri hagfræðiaðferð:

"4) 130-230 milljarðar fást með því að margfalda útistandandi skuldir á hverjum tíma með með meðalvaxtamun á hverju ári. Hér eru gengislán heimila og fyrirtækja undanskilin vegna óvissu sem ríkir vegna þeirra"   Ályktun Viðskiptaráðs 2012

Þetta sama Viðskiptaráð studdi skuldafyllerí bankanna og útrásarfyrirtækja með kjafti og klóm fyrir hrund sem setti allt efnahagslíf landsins í rúst. Þessi hópur ætti að kallast Viðskipta og viðreisnarráð ESB á Íslandi.

ESB sinnar geta aðeins beitt úreltum innantómum slagorðum sér til framdráttar eins og kommissarar fyrri tíðar, en auðvitað sér almenningur í gegnum þau. 

Ráðherraeinræði.

Utanríkisráðherra er uppvís að samráðsleysi og yfirgangi, útflutningur sjávarútvegs og landbúnaðar kvarta vegna þess. Nýr fríverslunarsamningur EFTA við Bretland gerður í flýti og án samráðs segja hagsmunaaðilar. Samráð við Alþingi lítið sem ekkert. Ráðherra svarar með skætingi og notar samninginn til að slá pólitískar keilur í prófkjörsslag. 

Er þetta nýjasta norm ráðherra á Íslandi í afgreiðslu á mikilvægustu málum landsins, eða er það bara Gulli eins og í Orkupakkamálinu?

Fríverslunarsamningur veldur vonbrigðum.

"Vonast hafði verið til að markaðsaðgangur íslenskra sjávarútvegsfyrirtækja yrði betri en fyrir útgöngu Breta úr Evrópusambandinu. Heiðrún Lind Marteinsdóttir, framkvæmdastjóri SFS, segir hins vegar að samningurinn sé sambærilegur við það sem fyrir var."

Samráðsleysi við landbúnaðinn. 

„Það er umhugsunarvert að önnur hagsmunasamtök hafi haft talsverða vitneskju um drög að samningi sem var í undirbúningi í utanríkisráðuneytinu sem hvorki hagsmunasamtök í sjávarútvegi eða landbúnaði máttu hafa skoðun á, þar sem um drög var að ræða. Þá þykja það sérstök vinnubrögð að tilkynna um fríverslunarsamninginn á föstudegi en sýna ekki innihald hans fyrr en rúmum tveimur sólarhringum síðar á heimasíðu Stjórnarráðsins.“ 

Samráðsleysi við Alþingi

Dýrkeypt sorpförgun

"Eitt er að fara í misheppnaða fjárfestingu fyrir sex milljarða - hitt að viðurkenna ekki mistökin, nema staðar og axla ábyrgð"- (Vigdís Hauksdóttir Mbl.is 5.6.2021)

Gaja er gælunafn umhverfisverndartrúboða á Jörðinni, þeir segja að hún sé sérstök lífvera. Gaja er líka nafn á gæluverkefni borgarstjórnar Reykjavíkur og félaga á "gas og jarðgerðarstöð" sem byggð var til að hringrása sorpi samkvæmt ESB/EES en framleiðir ónýtar, óseljanlegar afurðir eins og við var að búast.

EES-tilskipanir um sorpmeðhöndlun eru ekki nothæfar við íslenskar aðstæður  en eru mikill baggi á almenningi og bitna harðast á sveitarfélögunum og koma fram í síhækkandi útsvari. Samkvæmt þeim á að "endurvinna" sorp, láta það rotna og hirða haugloftið og "moltuna", það er svo umhverfisvænt. Þegar að er gáð er umhverfisvænast og ódýrast að urða sorp eða brenna því. Sjálfstæð fyrirtæki geta endurnýtt málma og sérhæfðan úrgang, án peninga frá skattgreiðendum Reglur ESB um úrgang henta ekki fyrir Ísland

Kosninga-fríverslunarsamningur

Nú er kominn kosningasperringur hér og í Noregi. Gulli og Erna monta sig með fríverslunarsamning við Breta, auðvitað gott mál að semja við hið nýfrjálsa Bretland þó einhverjar tískusýningar slæðist með (fríverslun með loftslagsmál!). Bretar eru ánægðir, frelsishetjan Nigel Farage segir að Bretar hefðu aldrei átt að yfirgefa EFTA en Sviss, Noregur, Ísland og Liechtenstein hafa verið þar allan tímann. Og nú getum við flutt út meir af óunnum fiski og inn meir af breskum mat! https://www.telegraph.co.uk/business/2021/06/04/norway-trade-deal-opens-door-british-farmers/

En Gulli og Erna geta ekki samið okkur úr verslunarhöftum ESB. Þau eru hluti af EES-samningnum og eru á vöruinnflutning til Íslands. Það þarf áfram að uppfylla reglufargan ESB, markaðsleyfi eða ce-merkingu eða ESB-samræmingu eða ESB-stimpla til að geta flutt ýmsar vörur frá Bretlandi til Íslands.

Það sem mundi koma á umfangsmiklu frelsi í viðskipti Íslands og Bretlands væri afnám EES-viðskiptakvaða á innfluttar vörur, þá gætu Íslendingar keypt frjálst frá Bretlandi og þar að auki öllum öðrum löndum heims. Til þess þarf að losa Ísland úr EES eins og Bretland.

https://www.frjalstland.is/2019/07/10/ees-samningurinn-er-ad-einangra-island/

 

Geta orkufyrirtæki í ESB keypt virkjanir og nýtingarrétt að orkulindum Íslands?

ESB krefst þess að orkufyrirtækjum í ESB/EES sé veittur aðgangur að íslenskum ám og jarðvarmasvæðum til jafns við íslensk almannafyrirtæki, bæði við byggingu nýrra virkjana og reglulega endurnýjun nýtingarleyfis núverandi virkjana. Ef Ísland hlýðir þessu þýðir það að orkulindir Íslands komast smám saman á forræði stórra erlendra fyrirtækja. Íslensk stjórnvöld hafa ekki treyst sér til að taka af skarið en eru í bréfaskriftum við eftirlitsskrifstofu EES (ESA) um málið.

Úthlutun á nýtingarrétti orkuauðlinda á samkvæmt ESB á að gera i opnu valferli þar sem jafnræðis sé gætt milli fjárfesta í ESB/EES og á grundvelli hlutlægra skilyrða fyrir vali á nýtingarleyfishafa. Tryggja skal að nýtingartími sé ekki lengri en þörf krefur fyrir virkjunaraðila að fá fjárfestingu til baka ásamt hæfilegum arði af fjárfestingunni. Ekki má veita rétthafa forgang til endurnýjunar að þeim tíma liðnum.

Orkufyrirtæki ESB/EES eiga samkvæmt þessu að fá samskonar aðgang að orkuauðlindum landsins, fallvötnum og jarðhitasvæðum, og fyrirtæki í almannaeigu ríkis og sveitarfélaga hafa hingað til fengið, og við fyrirskipaða endurnýjun nýtingarleyfanna fá ESB-fjárfestar tækifæri til að leggja undir sig orkuauðlindir sem nú eru nýttar af fyrirtækjum í almannaeigu.

ESA fyrirskipar stjórnvöldum Íslands að breyta landslögum: „Skrifstofan komst að þeirri niðurstöðu að íslensk löggjöf um veitingu virkjanaleyfa fyrir vatnsafls- og jarðvarmavirkjanir brjóti EES-lög“ (sjá mál ESA no. 69674 og bréf frá maí 2015 og feb. 2012)

Lög um nýtingarrétt orkuauðlinda ætlaði ríkisstjórnin að leggja fram vorið 2020. (Frumvarp til laga um breytingu á ýmsum lögum er varða nýtingu orkuauðlinda á opinberu forræði (nýtingarleyfi) vegna aðvörunar ESA). Frjálst land spurðist fyrir um hvort stefnan væri að veita ESB-fyrirtækjum sama aðgang að auðlindunum og íslenskum almannafyrirtækjum.

Svar forsætisráðuneytisins (2.4.2020) var að „Við skoðun málsins hafa komið upp rökstuddar efasemdir um að þjónustutilskipunin eigi við um raforkuframleiðslu. Íslensk stjórnvöld hafa því ákveðið að fresta fyrirhuguðum lagabreytingum uns betri vissa er fengin fyrir því hvaða þjóðréttarlegu skuldbindingar hvíla á íslenska ríkinu að þessu leyti. Frumvarpið sem vísað er til í þingmálaskrá verður því ekki lagt fram á Alþingi á þessum vetri.“

Frjálst land sendi aðra fyrirspurn 16.3.2021 um hvort fengist hefði einhver vissa fyrir hvort Íslandi sé skylt samkvæmt EES/ESB-valdboðum að heimila ESB/EES-aðilum afnotarétt af orkuauðlindum landsins?

Svar forsætisráðuneytisins kom 14.4.2021: „-komu stjórnvöld efasemdum sínum formlega á framfæri við Eftirlitsstofnun EFTA (ESA) síðastliðið sumar og vísuðu meðal annars til nýlegs dóms Evrópudómstólsins varðandi túlkun á þjónustutilskipuninni (dómur í máli Eco-Wind frá 28. maí 2020). Ekki hafa enn borist formleg viðbrögð frá Eftirlitsstofnun EFTA “.

(Vald Evrópudómstólsins (ESB-dómstólsins) á ekki að ná til Íslands en það er og hefur verið brotið í tengslum við EES)

Noregur hefur tekið af skarið og hafnað fyrirmælum ESA og heldur orkulindum á innlendu forræði í Noregi. https://www.frjalstland.is/wp-content/uploads/2021/04/190604-Svar-fra-dept-til-esa.pdf

Þann 16.2.2021 lagði Fjármálaráðherra fram: Frumvarp til laga um nýtingu á landi í eigu ríkisins í atvinnuskyni.

Þar segir m.a. í greinagerð:"Þannig liggur fyrir að nýta þarf land undir vindmyllur og mannvirki vegna annarrar orkunýtingar, t.d. stöðvarhús, stíflur, varnargarða o.fl. Lagt er til að frumvarpið gildi ekki um ráðstöfun landsvæðis undir mannvirki sem þessi. Þar sem tekið er fram að nýting landsins verði að vera í nánum tengslum við nýtingu réttindanna verður að skýra undanþáguna þröngt og má ekki ganga lengra við ráðstöfun landsins en nauðsynlegt er til að tryggja nýtingu auðlindarinnar. Þá skal tekið fram að þótt frumvarpið nái ekki til ráðstöfunar á þessum auðlindum er ekkert því til fyrirstöðu að ríkisaðilar beiti ákvæðum frumvarpsins, eða hafi þau í öllu falli til hliðsjónar, við slíkar ráðstafanir sem fara fram á grundvelli annarra laga."

Í umsögn Landsvirkjunar um frumvarpið hvetur  Landsvirkjun til þes að fjárlaganefnd taki af allan vafa í nefndaráliti um að umrædd löggjöf gildi ekki um vatnsréttindi, jarðhitaréttindi, réttindi til nýtingar vindorku eða landréttindi þessu tengt og skuli ekki beitt um slík réttindi.

Af þessu öllu má sjá að sótt er að orkulindum Íslands og almenningur verður að vera á verði því hagsmunir komandi kynslóða eru í húfi. Almenningur verður að þrýsta á stjórnmálamenn að bregðast ekki þó þeir hafi sýnt af sér mikla linkind í samskiptum við ESB og upptöku laga sem grafa undan yfirráðum Íslendinga á sínum orkuauðlindum.