Heima um jólin

Grindvíkingar hafa verið reknir úr heimilum sínum með rökum vanþróaðra vísinda og ofstjórnaraðgerðum stjórnvalda. Slíkt er orðið alvanalegt hjá okkur "þróuðum þjóðum". Nútímastjórnvöld halda að þau geti bjargað öllu og hafa sett á fót stofnanir sem verða að fá eitthvað að gera: Stöðva eldsneytisnotkun, slátra kúnum, búa til mýrlendi, stöðva samfélagið þegar kemur flensa, reka fólk að heiman þegar koma jarðskjálftar.

Grindavík er síðasta fórnarlamb ofstjórnarbáknsins. Grindvíkingar voru flæmdir úr heimilum sínum og hræddir með eldgosi í bænum. Svo kemur í ljós að eldgosið var ekki sérlega líklegt og að fyrirvarar yrðu nægir. Og eftir jarðskjálftana eru aðeins fá húsanna í bænum skemmd (nokkrir tugir af þúsund húsum) og Hitaveita Suðurnesja er fljót að hafa raflagnir, heitavatnslagnir og vatn í lagi. https://www.ruv.is/frettir/innlent/2023-11-21-skemmdir-i-grindavik-minni-en-margir-halda-397792

Stjórnvöld landsins hlaupa upp til handa og fóta með fálmkenndar aðgerðir og lofa með meira eða minna væmnum yfirlýsingum alls kyns styrkjum og fjárútlátum. Friðhelgi fjölskyldulífsins, skólastarf krakkanna, félagsöryggi bæjarbúa og ábyrgð borgaranna á sjálfumsér og sínum fjölskyldum og eignum er kastað fyrir róða. Hræðsluáróður og ofbeldi stjórnvalda tekur við.

Vísindi eru oft ónákvæm, jarðvísindi meðtalin, og fjölmiðlar ekki vísindalega þenkjandi heldur reyna að gera æsifregnir úr því sem hægt er. Og stjórnvöld dröslast með og eyða skattfé okkar í óhnitmiðaðar "aðgerðir". Og það sem er verst, valda því að fjöldi fólks, þar á meðal börn og unglingar, flosna upp úr sínu lífsferli, heimili, skóla eða starfi.

https://www.mbl.is/frettir/innlent/2023/12/15/haraldur_segir_lokunina_ekki_rettlaetanlega/